上海老底子每天呈送精彩文章一组
打开尘封的记忆，寻觅往昔的岁月
叙上海老底子事忆上海老底子人
诉上海老底子情
沪语悦读
好吃好用个边角料
作者：侯宝良
沪语诵读：和沁
阿拉一直提倡节约型社会，可现在条件好了收效甚小。看看拨厾脱个旧物事跟倒脱个食物，真让人触目。想起从前物资少个辰光，阿拉就拣市面浪便宜个吃、用侪有个边角料来买。搿眼物事一般侪是企业生产或加工成品后个剩余料，厾脱可惜又勿好再加工，就便宜卖脱。而对物品要求勿高个一般消费者倒是一种非常实惠个享用。
先讲食品，有碎饼干、切割华夫个边料、碎屑，定制奶油蛋糕个余料，覅看搿眼零零碎碎勿起眼个物事，其实材质是正宗个，味道侪勿差，价钿交关便宜，深受大家欢迎，还要掐准辰光才买得着。像阿拉以前住辣老西门，离小北门个南市豆制品厂勿远，晓得每天下半日有买新鲜个豆制品边角料，有碎豆腐干、豆腐干边料、碎粉皮、碎腐竹、碎素鸡唠啥。覅看是碎料，其实买回来侪要切了烧，碎了还省功夫唻。
下班后屋里吃晚饭人多，搿眼豆制品边料加眼蔬菜就是一桌丰盛个夜饭。像豆腐干丝炒芹菜，粉皮、腐竹咸肉汤、红烧素鸡酱油蛋，色香味侪勿错。质量好才是主要个，所以阿拉常桩下半日到伊门市部。上半日就是有卖阿拉也勿去，搿个老“门槛”侪懂个！
零食还是邻居阿六头有吃福，因为伊有亲戚辣食品厂工作，常常买回华夫边角料，各种碎饼干。伊吃多了勿稀奇，送拨阿拉倒真赞唻。平常头放辣豆糊浆、牛奶泡来当早点心，香喷喷覅太赞哦！有辰光食品店难般也有卖碎蛋糕、碎饼干啥个，搿基本是纸箱辣运输或搬运辰光产生数量勿多个正常损耗，摆出来机会老少。要是靠近食品厂附近就有福音了。以前边角料侪作为职工福利处理，后来工厂有三产，就放辣门市部销售。像七宝个吴宝路、江川路个文井路搿里有食品厂，伊拉就辣门口挂牌销售。阿拉只要经过搿排地方侪成了我个打卡之地。
除了吃个，用个物事也勿少，像皮件厂里零碎皮、服装厂零头布料，是皮匠、裁缝师傅及家庭主妇欢喜个地方。惯于精打细算又手巧个阿姨、妈妈们去淘来各种布料拼接成款式勿同个马甲，香槟衫，特别是小孩多个人家，省脱了布票，又勿比店里个时装推板。就是再小个毛料做双鞋面布覅太时髦噢。有心思个人把碎料剪成一块块方形拼成格子布。做块双面厚实个窗帘，既好看又挡风。大家侪讲上海人精明，搿一点真勿假。
家具厂或木材加工厂个边角余料是木匠师傅和动手力强个爷叔、伯伯要去个地方唻。当年木料紧张，假使外地有人带眼木料是算路子粗个。记得上海只能凭户口簿可以买眼零星木料，用来做简单个家具。阿拉丈人就用交关个小木头加胶水拼接了一只大个圆台面，台面浪贴一张装饰板，覅忒漂亮。蛮重，勿过逢年过节一家们团团坐一道，就象征阖家团圆嘛！
阿拉搿辈人侪喜欢自己动手花小钞票办大事，而且物尽其用。想想阿拉国家刚刚脱贫，物资丰富还勿至于人人富得为所欲为，更勿能成为恣意挥霍跟浪费个理由。时代变观念更新，虽讲覅墨守陈规，但勿能忘了初心丢了底线。真巴望实惠个边角料再重返市场。
根据年3月20日《新民晚报》上海闲话版改编
（配图来源：网络）
作者简介：
侯宝良，中国散文学会会员、上海市作家协会会员,经济师职称。散文、随笔、故事作品散见于上海及各地的报刊、杂志和电台。在《新民晚报》各版面已刊载了一百多篇的文章，汇集出版了《我和飞燕有个约》，先后出版了散文集《弹街路》《弹街路续集》《申情难忘》，评论集《孰是孰非》。多年来参与国内各类征文，其中《德娥》、《莲芸祈福》荣获第十六届、十八届中国月饼文化节征文的“一等奖”；《凝固的记忆》、《世博人家》、《三气定忠魂》《上海书展为我写好“上海闲话”》等先后获得上海移动十周年征文、上海“世博会”征文、上海第十七届读书节征文以及上海书展十周年征文的“二等奖”，还获得上海十六届国际艺术节、年第二十届上海国际电影节等的“最佳作品”奖、《做生活的强者》获年上海市民文化节改革开放四十年阅读中真善美征文的“十佳作品”。
沪语朗读者简介：
和沁，上海人，崇尚积极阳光的生活，喜欢宁静安逸的环境，与人和善，乐于公益事业活动，喜欢阅读，爱好文学，酷爱朗诵，立志做一个气质淡雅的书香女子。
鸣谢：侯宝良先生赐稿分享！
侯宝良先生怀旧文汇
原标题：《好吃好用个边角料（作者：侯宝良沪语诵读：和沁）》